*संगी बसंत बहार आगे*

*संगी बसंत बहार आगे*

संगी बसंत बहार आगे देखव आमा चार मउरागे!!
अमरइया मा कोयली कुहके सुग्घर गुरतुर गुरतुर लागे!!

रंग रंग के फूल फूलत हे जुना पाना झर के नवा उलहत हे!!
प्रकृति सजे संवरे लगत हे ये डारा वो डारा चिरई चहकत हे!!
लागत हे जइसे तिहार आगे
संगी बसंत बहार आगे.....

खेत मा सुग्घर सरसो फूले गेहूँ के बाली झूलना झूले!!
भुनुन भुनुन करत भौंरा बुले मुस्कावत फूल कहे मोला छुले!!
हरियर रंग मोर मनला भागे
संगी बसंत बहार आगे.....

मया के मौसम अइसे छाए मन के मिलौना तोर सुरता आए!!
कलप के हिरदे मोला सताए मिले बर तोला अमरइया बुलाए!!
रही रही नयना तोर रस्ता ताके
संगी बसंत बहार आगे......

अनिल सलाम

मोर खरतरिहा किसान

*मोर खरतरिहा किसान*

मोर खरतरिहा किसान, ये भुइँया के भगवान!!
कतका करँव मँय बखान, तोर महीमा हे महान!!

भइया फाँदे नागर अउ गाड़ा, भउजी सुखोए धान!!
ओरछा छाँव मा बइठ के सास, बहु मनला बताए ज्ञान!!
उसो उसो गोहर पारय, कुकरी खावय धान!!
मोर खरतरिहा...........

पहिरे बर कपड़ा कपसा उगाए, खाय बर उगाए धान!!
आनी बानी के फर फरेरी, बर लगाए बगान!!
जिये बर जिनगी सब जीनीस उगाए रोटी कपड़ा मकान!!
मोर खरतरिहा.............

देश के रक्षा करे बर तँयहा, बेटा ला बनाए जवान!!
बिरले होही अमीर के बेटा बनत होही जी जवान!!
बेटा करे जी देश के रक्षा पालन पोषन करे किसान!!
मोर खरतरिहा..............

गाँव मा सुग्घर खुशहाली आये, लहलहावय धान!!
तरिया डबरी भरे लबालब मुस्कावय किसान!!
प्रकृति सजे सँवरे सुग्घर धरती लागय सरग समान!!
मोर खरतरिहा............

अनिल सलाम